د المپیک ملي کمېټې او ورزش ریاست یو پلاوی ایران ته ورسېد
د المپیک ملي کمېټې او ورزش ریاست له لارښوونې سره سم تېره ورځ د یاد ریاست یو پلاوی ګاونډي هېواد ایران ته ورسېد.
په دغه پلاوي کې د بدني روزنې او ورزش ریاست مالي او حسابي مسوول احمدناصر زاخیلی، د سلاکار بورډ غړی استاد جانعلم حسیني او د فوټبال فدراسیون سلاکار استاد دینمحمد صافی شامل دي.
یاد پلاوي ګاونډي هېواد ته د افغان مهاجرو ورزشکارانو د ستونزو اورېدو او د هغوی د ورزش روان بهیر د ارزولو په موخه سفر کړی دی.
پلاوی ته د امامخمیني هوایي ډګر کې د افغان ورزشکارانو له خوا تود هرکلی وشو.
ټاکل شوې ده، چې دغه پلاوی د ایران څو بېلابېلو ولایتونو ته سفر وکړي، چې هلته افغان ورزشکاران مېشت دي. پلاوی به هلته د افغان ورزشکارانو د استازي ټاکلو لپاره ټاکنې وکړي او د هغوی ستونزې او ورزشي بهیر به هېواد کې د ورزش ادارې مشرتابه سره شریکې کړي.
