لوګر ولایت کې د پنځو ولايتونو ورزشکارانو ترمنځ د ووشو ساندا وانګ سيالۍ ترسره شوې
په لوګر ولايت کې د ووشو فدراسيون له لورې د دې ولايت په کوربتوب د لوګر، پکتيا، خوست، ميدان وردګ او پکتیکا ولايتونو ورزشکارانو ترمنځ د ووشو ساندا وانګ سيالۍ ترسره شوې.
دغه سيالۍ چې د کوچنيانو، نوي ځوانانو، ځوانانو او لويانو سني کټګوريو کې ترسره شوې د ټولو ولايتونو شاخوا ٥٠ تنو ورزشکارانو پکې برخه لرله.
په دې سياليو کې د لوګر ولايت دوو روزونکو، دوو استادانو محمد اميد جهيد، عبدالغني محمدي، دوو کوچونو او ١٤ ورزشکارانو ګډون درلود.
دغه سيالۍ وړمه ورځ د زمري په٦نېټه د يوې ورځې لپاره ترسره شوې.
په دغو سياليو کې د لوګر ولايت د سرو زرو ١٣مډالونو او د اتلولۍ جام امتياز په ترلاسه کولو سره لومړى مقام خپل کړ.
