د المپیک ملي کمېټې او سپورټ عمومي ریاست د رییس ښاغلي نظر محمد مطمین له خوا افغان سنوکر کاران وستایل شول
په جنوبي اسیا کې د سارک شپږو هېوادونو تر منځ د سنوکر سیالۍ تر سره شوې، چې افغان سنوکرانو هم پکې ګډون درلود.
افغان لوبغاړو په دې سیالیو کې درېیم مقام خپل کړ، چې له سیالیو وروسته خپل هېواد افغانستان ته ډک لاس راستانه شول.
یادو لوبغاړو د شنبې پر ورځ د المپیک ملي کمېټې او سپورټ عمومي رباست له رییس ښاغلي نظرمحمد مطمین سره د هغه په دفتر کې وکتل.
د سنوکر دا لوبغاړي د بدني روزنې، ورزش او المپیک د رئیس له خوا وهڅول شول او د هغوی له لاسته راوړنو څخه یې هرکلی وکړ.
نوموړي دې ناستې ته په خپلو څرګندونو کې وویل: په راتلونکي کې به هم افغان ورزشکارانو ته لازمې اسانتیاوې برابروي، تر څو افغان ورزشکاران وتوانیږي په نړیوالو سیالیو کې هېواد ته لا ډېرې بریاوې په برخه کړي.
