ننګرهار؛ د مومندرې ولسوالۍ د کرکټ ټېپ بال سيالۍ د باسول سوپر سټار لوبډلې په اتلولۍ پاى ته ورسېدې
د کرکټ ټېپ بال دغه سيالۍ چې د ننګرهار ولايت د ورزش ریاست له لوري، د مومندرې ولسوالۍ د ٦٠ لوبډلو ترمنځ د لوى اختر په مناسبت د اختر په دويمه ورځ پيل شوې وې، د باسول سوپر سټار لوبډلې په ګټه پاى ته ورسېدې.
د دغو سياليو پایلوبې ته د باسول شاهين او باسول سوپر سټار لوبډلې ووتلې، چې د باسول شاهين لوبډلې د لوبې پچه وګټله او لومړى يې د توپوهنې پرېکړه وکړه، چې په ټاکلو لس اورونو کې يې د اووه لوبغاړو په سوځېدو سره خپل سيال ته د ٩٩ منډو هدف ورکړ.
په مقابل کې د باسول سوپر سټار لوبډلې ورکړل شوى هدف د لوبې په نهم اور کې د اووه لوبغاړو په سوځېدو سره پوره کړ او د يادو سياليو اتلولي يې خپله کړه.
