کابل؛ د تکواندو د مخکښو ورزشکارانو ترمنځ د تکواندو تدارکاتي سيالۍ ترسره شوې
د بدني روزنې او ورزش عمومي ریاست د تکواندو ملي فدراسیون په مرکزي تمريناتي ځاى کې د تکواندو ٥٠ مخکښو ورزشکارانو ترمنځ په اتو وزنونو کې د تکواندو المپيکي تدارکاتي سيالۍ ترسره شوې.
دغه سيالۍ چې يوه ورځ يې دوام وکړ په څلور المپيکي وزنونو کې څلور ورزشکارانو اتلولي وګټلې.
د دغو سياليو کې په ٥٨کيلو وزن کې محسن رضايي، ٦٨ کيلو کې حکمت الله زين، ٧٤ کيلو وزن کې اميد سهاک او په مثت اتيا کيلو کې علي اکبر اميري خپلو سيالانو ته په ماتې ورکولو سره لومړي مقامونه تر لاسه کړل.
د دغو سياليو د ترسره کېدو موخه د کوريا تکواندو ازادو سياليو، اسيايي او نورو بين المللي سياليو ته چمتووالى دى.
ټاکل شوې د افغانستان تکواندو ملي لوبډله به تر راتلونکو دوو اوونیو جنوبي کوریا ته سفر وکړي او په درېيو مهمو بين المللي سياليو کې به ګډون وکړي.
له هغه وروسته به د سیپټمبر په مياشت کې د چين هېواد په کوربتوب اسيايي سياليو کې د ګډون لپاره چين ته سفر وکړي چې د اسيايي هېوادونو د ورزشکارانو لپاره د ٢٠٢٣ کال له مهمو لوبو څخه شمېرل کېږي.
