میدان وردګ؛ په جغتو کې د ټېپ بال کرکټ سیالۍ د بلند بابا لوبډلې په بریا پای ته ورسیدې
د میدان وردګ ولایت په جغتو ولسوالۍ کې د ټېپ بال کرکټ سیالۍ چې د دې ولایت د بدني روزنې او سپورټ امريت او جغتو ولسوالۍ ورزشي کمېټې له لوري د تکې په کلې کې دوې اوونۍ وړاندې د ٢٥ لوبډلو ترمنځ پيل شوې وې د بلند بابا اتلانو لوبډلې په اتلولي پاى ته ورسېدې.
د دغو سياليو پایلوبې ته بلند بابا اتلان او بابکر خیل لوبډلو لار ومونده، چې لومړی توپوهنه بابکر خیل لوبډلې وکړ، چې په ټاکلو ۱۰ اورونو کې يې ۹۵ منډې وکړې.
په مقابل کې د بلند بابا اتلانو لوبډلې د پنځو ویکټو په زیان ټاکلى هدف په نهم اور کې پوره کړ او د دغه ټورنمنټ اتلولي یې خپله کړه.
په پای کې د لومړي مقام ګټونکې لوبډلې ته يو عراده موټرسايکل ،دويم او درېيم مقام ګټونکو لوبډلو ته کپونه او ستاينليکونه ورکړل شول.
د دغو لوبو موخه د ولايت په کچه ورزش ته وده ورکول دي.
