ننگرهار؛ کابل لوبډلې د لعلپورې ولسوالۍ د ټېپ بال کرکټ سياليو اتلولي وگټله
د ننگرهار ولايت د بدني روزنې او سپورټ رياست اړوند د ټېپ بال کرکټ فدراسيون د استازولۍ له لوري په لعلپورې ولسوالۍ کې د ۳۰ لوبډلو ترمنځ د ټېپ بال کرکټ سيالۍ د کابل لوبډلې په اتلولۍ پای ته ورسېدې.
د يادو سياليو پايلوبه د کابل او لعلپورې ولسوالۍ لوبډلو ترمنځ ترسره شوه، چې په پايله کې کابل لوبډلې په ټاکلو لسو اورونو کې د پنځو لوبغاړو په سوځېدو سره خپلې سيالې لوبډلې ته د ۱۳۸ منډو هدف کېښود، لعلپورې لوبډلې ياد هدف تر لاسه نه کړ او د ۲۰ منډو په توپير يې ماته ومنله.
د دغو سياليو د ترسره کېدو موخه ورزش ته د ځوانانو هڅول او ترمنځ يې سالم رقابت و، چې شاوخوا يوه مياشت يې دوام وکړ او په پای کې گټونکې لوبډلې ته د اتلولۍ جام ورکړل شو.
