لغمان؛ اليشنگ ولسوالۍ کې د ۳۶ لوبډلو ترمنځ د واليبال سيالۍ پای ته ورسېدې
د لغمان ولايت د بدني روزنې او سپورټ امريت اړوند د واليبال فدراسيون د استازولۍ له لوري د اليشنگ ولسوالۍ په غازي آباد کلي کې د ۳۶ لوبډلو ترمنځ د واليبال سيالۍ د اليشنگ لوبډلې په اتلولۍ پای ته ورسېدې.
د يادو سياليو پايلوبه د اليشنگ ولسوالۍ او غازي آباد لوبډلو ترمنځ ترسره شوه، چې په پايله کې اليشنگ لوبډلې خپلې سيالې لوبډلې ته ۱/۳ ميدانونو په توپير ماتې ورکړه او اتلولي يې خپله کړه.
د دغو سياليو د ترسره کېدو موخه د ځوانانو ترمنځ يووالی او له نظام څخه ملاتړ و، چې شاوخوا يوه مياشت يې دوام وکړ او په پای کې د ياد ولايت د ورزش امريت له لوري لومړي، دويم او درېيم مقام گټونکو لوبډلو ته کپونه، مډالونه او ستاينليکونه ورکړل شول.
