بغلان؛ پلخمري کې د ۵۰ تنو ورزشکارانو ترمنځ د وزلوبې سیالۍ ترسره شوې
د بغلان ولایت د بدني روزنې او ورزش امریت اړوند د وزلوبې فدراسیون د استازولۍ له لوري او د ذبیح الله حسین خېل په مالي ملاتړ د یاد ولایت پلخمري ولسوالۍ په کنډک آبياري سيمه کې د ۵۰ تنو ورزشکارانو ترمنځ د وزلوبې سیالۍ ترسره شوې.
په یادو سیالیو کې د بغلان ولایت پر بېلابېلو ولسوالیو سربېره د سمنګان ولایت چاپ اندازانو هم ګډون کړی و.
د دغو سیالیو په لومړۍ لوبه کې درې آخرلاقونه ترسره شول، چې لومړی یې پهلوان سمیع الله، دویم یې پهلوان اسدالله ترسره کړ؛ خو درېیم آخرلاق بیا صلح اعلان شو.
د یادو سیالیو نندارې ته د بغلان ولایت د بدني روزنې او ورزش آمر، نظامي مسؤولانو او د وزلوبې زرګونه مینوال ورغلي و.
دغه سیالۍ د دوو ورځو لپاره د ملي او دودیزو لوبو د ودې په موخه په لاره اچول شوې وې.
