د بډمنټون اووه کسيزه ډله په براکس سياليو کې د گډون په موخه روسيې ته روانه شوه
د المپيک، بدني روزنې او سپورټ لوی ریاست په همکارۍ د بډمنټون ملي فدراسیون اووه کسيزه ډله د لومړي ځل لپاره په براکس سياليو کې د گډون په موخه روسيې هېواد ته روانه شوه.
په دغو سياليو کې ۱۳ هېوادونه گډون کوي، چې پنځه ورځې به دوام وکړي.
د خدای په امانۍ په مراسمو کې د المپيک، بدني روزنې او سپورټ لوی ریاست د نشراتو او عامه پوهاوي رييس الله محمد اتل مشواڼي، د ياد رياست د دعوت او ارشاد رييس داد محمد بريال عطايي، د بډمنټون فدراسيون رهبري پلاوو او ورزشکارانو گډون کړی وو.
په دغو مراسمو کې د دعوت او ارشاد رييس داد محمد بريال عطايي ورزشکارانو ته ځينې مهمې لارښوونې وکړې، نوموړي وويل: " د ورزشکار لپاره پکار ده چې د ورزش ترڅنگ صفاء نيت ولري، کله چې نيت صفاء وي او د الله تعالی رضاء پکې وي، نو حتما بريا يې په برخه وي او ورزش په عبادت کې شمېرل کېږي."
د ښاغلي عطایي په ټکو: "د دې ترڅنگ ورزشکار بايد په اسلامي لباس سمبال و اوسي، له منکراتو څخه ځان وساتي او د پنځه وخته لمانځه پابند و اوسي" ښاغلي عطايي په خپلو خبرو کې زياته کړه تاسو بايد د اسلامي اخلاقو څخه کار واخلئ تر څو هلته غیر مسلمه خلک له تاسو څخه متاثره شي، همدارنګه ښاغلي عطايي ورزشکارانو ته د مسافرانه لمانځه په هکله معلومات ورکړل او هېله يې څرگنده کړه، چې ډکې منگولې هېواد ته راستنه شئ.
د مراسمو په دوام د نشراتو او عامه پوهاوي رييس اتل مشواڼي وويل: د اسلامي امارت په راتگ سره ورزش له بل هر وخت وده کړې ده، چې تاسو د ډېرو لاسته راوړنو شاهدان ياست او بايد سترگې پرې پټې نه شي او زیاته یې کړه تاسو د يو ملت او نظام استازيتوب کوئ، بايد د دې نظام شعايرو ته درناوی وکړئ او ټول تمرکز مو په خپلو سياليو وکړئ، په ياد ولرئ د هېواد د ورزش اداره تل ستاسو ملاتړ کوي.
د يادونې وړ ده، چې دغه سيالۍ د روسیې هېواد په کازان ښار کې د جون په ۱۳مه نيټه شروع کېږي، چې پنځه ورځې به دوام وکړي.
