کونړ؛ مرکز کې د ١٦ لوبډلو ترمنځ د ټېپ بال کرکټ سیالۍ پای ته ورسېدې
د کونړ ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري د ياد ولايت مرکز اړوند یارګل سیمه کې د ١٦ لوبډلو ترمنځ د ټېپ بال کرکټ سیالۍ د ایلیون سټار لوبډلې په اتلولي پای ته ورسېدې.
د یادو سیالیو پای لوبه د ایلیون سټار او انګلیسي ادبیاتو لوبډلو ترمنځ ترسره شوه. د لوبې پچه د انګلسي ادبیاتو لوبډلې وګټله او د توپوهنې پرېکړه یې وکړه، چې په ټاکلو اتو اورونو کې یې د خپلو اووه لوبغاړو په له لاسه ورکولو سره سیالې لوبـډلې ته د ٦٧ منډو هدف وټاکه. ایلیون سټار لوبډلې یاد هدف د دوو لوبغاړو په له لاسه ورکولو سره د لوبې په شپږم اور کې ترلاسه کړ او د اتو ویکټو په توپیر یې د یادو سیالیو اتلولي وګټله.
يادې سیالۍ ورزش ته د ځوانانو د هڅولو په موخه ترسره شوې، چې ١٥ ورځې یې دوام وکړ.
