کاپیسا؛ السای ولسوالۍ کې د اتو لوبډلو ترمنځ د ټېپ بال کرکټ سیالۍ پای ته ورسېدې
د کاپیسا ولایت د بدني روزنې او ورزش امریت په مرسته د السای ولسوالۍ د ځوانانو له لوري د یاد ولایت په السای ولسوالۍ کې د اتو لوبډلو ترمنځ د ټېپ بال کرکټ ۱۲ اوریزه سیالۍ د السای عقابان لوبډلې په اتلولۍ پای ته ورسېدې.
د دغو سیالیو په پایلوبه کې اتحاد چهار قوم السای لوبډلې په ټاکلو ۱۲ اورونو کې سیالې السای عقابان لوبډلې د ۱۱۰ منډو هدف وټاکه په مقابل کې د السای عقابان لوبډلې یاد هدف په یوولسم اور کې پوره او د درې ویکټو په توپير یې اتلولي خپله کړه.
د یادو سیالیو موخه د ټېپ بال کرکټ ته د ځوانانو هڅوول و، چې ۲۰ ورځې یې دوام وکړ.
د سیالیو په پای کې د کاپیسا ورزشي امریت له لوري غوره لوبډلې ته د اتلولۍ جام او غوره لوبغاړو ته بېلا بېلې ورزشي ډالۍ ورکړل شوې.
