کندز؛ په امام صاحب ولسوالۍ کې د درېوو ولايتونو ترمنځ د کيک بوکسنگ ټاکنيزې سيالۍ ترسره شوې
د کندز ولایت د بدني روزنې او ورزش رياست او د امام صاحب ولسوالۍ ورزشي مديريت په گډه همغږۍ په يادې ولسوالۍ کې د درېوو ولايتونو د ۸۰ تنو ورزشکارانو ترمنځ د کندز منتخبې لوبډلې ته د غوره لوبغاړو موندلو په موخه د نويو ځوانانو، ځوانانو او مشرانو په عمري کټگوريو کې د کيک بوکسنگ ټاکنيزې سيالۍ ترسره شوې.
په دغو سياليو کې له تخار، بغلان او کندز ولايت څخه ورزشکارانو گډون کړی و، چې په پايله کې کندز د ۱۵ امتيازونو په ترلاسه کولو سره لومړی، تخار د ۱۲ امتيازونو په ترلاسه کولو سره دويم او بغلان بيا د ۲ امتيازونو په ترلاسه کولو سره درېيم مقام خپل کړ.
د يادولو وړ ده، چې د يادو سياليو په پای کې لس تنه غوره ورزشکاران د کندز ولايت منتخبې لوبډلې ته وټاکل شول، چې په راتلونکې کې به د هېواد په کچه ملي سياليو کې گډون وکړي.
