کابل کې د ۱۰۰ ورزشکارانو ترمنځ د جمناستیک څلورم پړاو ملي ټاکنیزې سیالۍ پيل شوې
د المپيک، بدني روزنې او ورزش عمومي ریاست اړوند د جمناستیک ملي فدراسیون له لوري د یاد ریاست په ۵۰۰ کسیز جمنازیوم کې د هېواد له اتلسو ولایتونو د ۱۰۰ ورزشکارانو ترمنځ د جمناستیک څلورم پړاو ملي ټاکنیزې سیالۍ پيل شوې.
دغه سیالۍ به د نویو ځوانانو، ځوانانو او د مشرانو ورزشکارانو په عمري کټګوریو کې ترسره شي، چې په پایله کې به ۱۸ ورزشکاران د هېواد جمناستیک ملي لوبډلې ته وټاکل شي.
د دغو سیالیو د پيل په مراسمو کې د المپيک، بدني روزنې او ورزش عمومي ریاست مالي او اداري ریئس مولوي عبدالناصر هاشمي، د کابل بدني روزنې او ورزش ریاست ریئس مولوي عتیق الله خالد، د هېواد د ورزش ادارې د فني او مسلکي ریاست سرپرست عبدالحمید صافي، د جمناستیک ملي فدراسیون رهبري پلاوي، ورزشکاران او زیات شمېر مینوالو ګډون کړی وو.
په دغو مراسمو کې د کابل ولایت د بدني روزنې او ورزش ریئس مولوي عتیق الله خالد د اسلام مبارک دین له نظره د ورزش په ارزښت خبرې وکړې او زیاته یې کړه: دغه ډول سیالۍ د دې لامل کېږي، ترڅو د هېواد د جمناستیک ملي لوبډلې ته غوره ورزشکاران وموندل شي.
ورپسې د هېواد ورزش ادارې د فني او مسلکي ریاست سرپرست عبدالحمید صافي له ولایتونو څخه راغلو ورزشکارانو ته ښه راغلاست وویلې او د دوی د بریا غوښتونکی و او همدارنګه یې زیاته کړه: دغه ډول سیالۍ د ورزشکارانو لپاره یو ښه فرصت دی، ترڅو له دغه فرصت څخه په ښه ډول استفاده وکړي او خپلې وړتیاوې وښایي.
د یادو سیالیو موخه د جمناستیک ملي لوبډلې ته د غوره ورزشکارانو موندل دي، چې دوې ورځې به دوام وکړي.
