کابل کې د لسو لوبډلو ترمنځ د کابل فوټسال الف لیګ سیالۍ پای ته ورسېدې
کابل کې د فوټبال ملي فدراسیون اړوند فوټسال کمېټې له لوري د لسو لوبډلو ترمنځ د کابل فوټسال الف لیګ سیالۍ د دلاور زاده دره ترکمن لوبډلې په اتلولي پای ته ورسېدې.
د یادو سیالیو پایلوبه کې دلاور زاده دره ترکمن لوبډلې د ٥ پر ٢ ګولونو په توپیر خپلې سیالې جوانان پنجشیر لوبډلې ته ماتې ورکړه او اتلولي یې وګټله.
د سیالیو په پای کې دلاور زاده دره ترکمن لوبډلې د ٢١ نمرو په ترلاسه کولو سره لومړی او ياران عطایي لوبډلې د ٢٠ نمرو په ترلاسه کولو سره دویم مقام خپل کړ او دواړو لوبډلو د کابل فوټسال غوره لیګ سیالیو ته لار ومونده.
د دغو سیالیو د پای په مراسمو کې د ورزش ادارې فني او مسلکي مرستیال حافظ احمدجان ځدراڼ، د فوټسال کمېټې فني مرستیال حاجي فرید یوسفزي او د ورزش ګڼو مینوالو ګډون کړی و.
دا سیالۍ د کابل فوټسال غوره لیګ سیالیو ته د غوره لوبډلو ټاکلو په موخه ترسره شوې، چې یوه میاشت یې دوام وکړ.
