ورزشکارانو ته دې د پروټین د بې ځایه کارونې په برخه کې سیمنارونه وړاندې شي.
نعیم پرهېز
دوشنبه، مرغومی ۶، ۱۴۰۰
د پکتیا ولایت د بدني روزنې او ورزش رئیس نوراحمن تسکین د دې ولایت د عامې روغتیا له مسولینو سره لیدنه وکړه او د لوبغاړو د روغتیایي خدمتونو په برخه کې یې په ځینو مسایلو ورسره خبرې وکړې.
نوموړي د عامې روغتیا مسولینو سره په خبرو کې وویل: د ورزشکارانو د سیالۍ پرمهال د احتمالي ستونزو د پېښېدو په برخه کې باید له وړاندې سهولتونه چمتو شي او په دې برخه کې مو همکاري اړینه ده.
ښاغلي تسکین د عامې روغتیا له مسولینو وغوښتل د هغو درملو په برخه کې ورسره مرسته وکړي کوم چې د لوبې پر مهال ورته اړتیا پېښېږي.
هغه له مسولینو د لوبو پر مهال د امبولانس او ډاکټر د شتون ترڅنګ وغوښتل چې د کلبونو استادانو او ورزشکارانو ته د پروټین د بې ځایه کارونې د زیانونو په برخه کې سمینارونه هم وړاندې کړي.
هېره دې نه وي چې د پکتیا ولایت د عامې روغتیا ریاست له لوري ورته د بښپړې همکارۍ ډاډ ورکړل شو.
