په کابل کې د ترکیې هېواد د تیکا دفتر چارواکو د بدمنتون سیالیو د ترسراوي په برخه کې د همکارۍ ژمنه وکړه
په کابل کې د ترکیې هيواد د تیکا دفتر همغږی کوونکی فاضل عاقن اردوغان د پلازمینې کابل د بدمنتون سیالیو له میدان او جمنازیم څخه، چېرته چې په نږدې راتلونکې کې به یادې سیالۍ ترسره شي، لیدنه وکړه.
اردغان د یادې رشتې سیالیو ته د ورزشکارانو له چمتووالي هم ليدنه وکړه او خوښي یې څرګنده کړه، چې په افغانستان کې د بدمنتون سیالۍ په ښه کیفیت روانې دي او چمتووالی ورته نیول کیږي.
نوموړي د افغانستان د المپيک ملي کمېټې او سپورټ عمومي رياست له مرستیال حافظ احمد جان او د بدمنتون فدراسیون سرپرست ارشادالحق صدیقي سره په ليدنه کې په افغانستان کې د بدمنتون له ورزش سره د ځوانانو مینه وستایله او غوښتنه یې وکړه، چې باید یاد ورزش نوره وده او پرمختګ هم وکړي او هيله يې وښوده، چې د يادو سياليو انتخابي مسابقې به په معياري ډول ترسره شي.
همدا راز د افغانستان د ورزش او المپیک ملي کمېټې چارواکو په هېواد کې د بدمنتون ورزش د چوپړتیاوو ، امکاناتو او په پلازمینې کابل او ولایتونو کې د ځوانانو تر منځ د دې ورزش د ودې او سیالیو پر اړه معلومات ورکړل.
د تیکا دفتر همغږي کوونکي همدا راز د خپلو خبرو پر مهال په راتلونکي کې د بدمنتون سیالیو په معیاري ترسراوي بحث او خبرې وکړې او په دې برخه کې یې د خپل هېواد د مرستې او همکارۍ ژمنه وکړه.
