خوست؛ مرکز متون ښار کې د ۲۰ لوبډلو ترمنځ د ټېپ بال کرکټ سیالۍ پای ته ورسېدې
د خوست ولايت د بدني روزنې او ورزش آمریت له لوري د ياد ولايت د مرکز متون ښار د ورغه کلي په ميدان کې د ځوانانو د یووالي په نوم د ۲۰ لوبډلو ترمنځ د ټېپ بال کرکټ سیالۍ پای ته ورسېدې.
د دغو سياليو پایلوبه د سنګر او محمد الله لوبډلو ترمنځ ترسره شوه، سنګر لوبډلې د پچې په ګټلو سره د توپ وهنې پرېکړه وکړه چې په ټاکلو ۸ اورونو کې یې د ۶ لوبغاړو په سوځېدو سره مقابلې لوبډلې ته د ۸۷ منډو هدف وټاکه. په ځواب کې د محمدالله لوبډلې ټاکل شوی هدف د لوبې په ۶ اور کې د ۷ لوبغاړو په سوځېدو سره پوره کړ او لوبه يې د ۳ ويکټو په توپير وګټله او اتلولي یې وګټله.
د يادو سياليو موخه د ځوانانو ترمنځ یوالی رامنځته کول و، چې يوه مياشت يې دوام وکړ.
دغو سياليو په پای کې ګټونکې لوبډلې ته کپ او غوره لوبغاړو ته تحفې او ستاينليکونه ورکړل شوه.
