ميدان وردگ؛ جغتو ولسوالۍ کې د ۳۶ لوبډلو ترمنځ د ټېپ بال کرکټ اختريزې سيالۍ پای ته ورسېدې
د ميدان وردگ ولايت د بدني روزنې او ورزش آمريت اړوند د ټېپ بال کرکټ فدراسيون د استازولۍ له لوري د ياد ولايت په جغتو ولسوالۍ کې د ۳۶ لوبډلو ترمنځ د ټېپ بال کرکټ سيالۍ، چې اته ورځې مخکې پيل شوې وې د رباط اتلو لوبډلې په اتلولۍ پای ته ورسېدې.
د دغو سیالیو پايلوبه کې رباط اتلو او مسعود اتلانو لوبډلو ترمنځ ترسره شوه، د لوبې پچه رباط اتلو لوبډلې وگټله او لومړی يې د توپ وهنې پریکړه وکړه، چې په ټاکلو اتو اورونو کې يې خپلې سيالې لوبډلې ته د ۹۲ منډو هدف وټاکه، په مقابل کې مسعود اتلانو لوبډلې ۷۶ منډې وکړې او لوبه يې د ۱۶ منډو په توپير وبايلله.
د يادو سیالیو موخه د ځوانانو ترمنځ يووالی رامنځته کول او د يادې ولسوالۍ وگړو لپاره د سالمې تفريح برابرول وو.
