څوکۍ ولسوالۍ لوبډلې د کونړ ولايت په کچه د واليبال سياليو اتلولي وگټله
د کونړ ولايت د بدني روزنې او ورزش آمريت اړوند د واليبال فدراسيون د استازولۍ له لوري د ياد ولايت په مرکز نوآباد سيمه کې د ۱۶ لوبډلو ترمنځ د ياد ولايت په کچه د واليبال سيالۍ، چې ۱۵ ورځې مخکې پيل شوې وې د څوکۍ ولسوالۍ لوبډلې په اتلولۍ پای ته ورسېدې.
د يادو سياليو په پايلوبه کې څوکۍ ولسوالۍ لوبډلې خپلې سيالې خاص کونړ ولسوالۍ لوبډلې ته د ۱/۲ ميدانونو په توپير ماتې ورکړه او اتلولي يې وگټله.
د ويلو وړ ده، چې د دغو سیالیو په پای کې د کونړ ولایت د ورزش آمريت له لوري اتلې لوبډلې ته د اتلولۍ جام او غوره لوبغاړو ته بېلابېلې ورزشي ډالۍ ورکړل شوې.
