هلمند؛ ناوې ولسوالۍ کې د ۱۲ لوبډلو ترمنځ د ټېپ بال کرېکټ سيالۍ پای ته ورسېدې
د هلمند ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د ناوې ولسوالۍ په ريگستان لوبغالي کې د ۱۲ لوبډلو ترمنځ د ټېپ بال کرېکټ گروپي سيالۍ، چې ۲۰ ورځې مخکې پيل شوې وې د پوپل افغان لوبډلې په اتلولۍ پای ته ورسېدې.
د يادو سياليو پايلوبه د پوپل افغان او ناوې بارکزيو لوبډلو ترمنځ ترسره شوه. د لوبې پچه پوپل افغان لوبډلې وگټله او لومړی يې د توپ وهنې پرېکړه وکړه، چې په ټاکلو ۱۴ اورونو کې يې خپلې سيالې لوبډلې ته د ۲۲۰ منډو هدف وټاکه، په مقابل کې ناوې بارکزيو لوبډلې د ټولو اورونو په لوبولو سره ۲۰۴ منډې وکړې او سيالي يې د ۱۶ منډو په توپير وبايلله.
د ويلو وړ ده، چې د دغو سياليو موخه ورزش ته د ځوانانو هڅول او ترمنځ يې يووالی رامنځته کول وو.
