کابل کې د پهلوانۍ ګريګورمن سبک ملي لوبډلې ته غوره شوي پهلوانان وستايل شول
د المپيک، بدني روزنې او ورزش عمومي رياست په همکارۍ د پهلوانۍ ملي فدراسيون له لوري په کابل کې د پهلوانۍ ګريګورمن سبک ملي لوبډلې ته لار موندونکي پهلوانان، چې سيالۍ يې څه موده وړاندې ترسره شوې وې، د المپيک ملي کميټې د غونډو په تالار کې د يوې ځانګړې غونډې په ترڅ کې وستایل شول.
دغه سيالۍ د لويانو ورزشکارانو د عمري کټګورۍ په لسو بېلابېلو وزنونو کې د هېواد د ۶ ولايتونو څخه د ۵۰۰ پهلوانانو ترمنځ ترسره شوې وې، چې په پايله کې يې ۴۰ ورزشکارانو د هېواد د پهلوانۍ د ګريګورمن سبک ملي لوبډلې ته لار موندلې وه او نن ( چهارشنبه، د مرغومې پر ۱۷مه) نېټه يې د تشويق او تقدير مراسم ترسره شول.
د دې مراسمو پر مهال د المپيک، بدني روزنې او ورزش عمومي رياست اداري او مالي رئيس مولوي عبدالناصر هاشمي، ټولو برياليو او مقام ګټونکو لوبغاړو ته د مبارکۍ ترڅنګ په اسلام کې د ورزش د ارزښت په اړه معلومات وړاندې کړل.
دغه راز د دې رياست د دعوت او ارشاد رئيس مفتي داد محمد بريال عطايي بیا د پهلواني ګريګورمن سبک ملي لوبډلې، ټاکل شويو لوبغاړو ته د مبارکۍ تر څنګ هيله اوښوده، چې په نړيوالو سياليو کې ښه ولوبیږي او افغانستان ته وياړونه راوړي.
همدارنګه د پهلوانۍ لوبې روزنکي محمد سالم احسان وويل، پهلواني يوه سنتي او اوږد تاريخ لرونکي لوبه ده، چې په دې وروستيو کې يې ښه وده کړې ده.
د ويلو ده، چې په دې مراسمو کې د هېواد د ورزش ادارې د بېلابېلو رياستونو رئيسانو، د پهلواني ملي فدراسيون رهبرۍ، پهلوانانو او ګڼ شمير هېوادوالو ګډون کړی و، چې په پايله کې يې مقام ګټونکو لوبغاړو ته ستاينليکونه او مډالونه ورکړل شول.
