افغان ځوانانو کرېکټ ملي لوبډله د ۱۹ کلنو کم عمره ځوانانو نړیوال جام سياليو نيمه پايلوبې ته ووتله
د افغانستان له ۱۹ کلنو کم عمره کرېکټ ملي لوبډلې د ۲۰۲۶ له ۱۹ کلنو کم عمره کرېکټ نړيوال جام سياليو د شپږ غوره لوبډلو پړاو کې خپلې سيالې ايرلينډ لوبډلې ته د ۱۹۱ منډو په ستر توپیر ماتې ورکړه او د دې سياليو نيمه پايلوبې ته يې لار وموندله.
په دغه لوبه کې افغان لوبډلې په لومړۍ توپوهنې سره د فيصل خان شينوزاده د ۱۶۳ منډو او د لوبډلمشر محبوب خان تسکين د ۸۹ منډو پر مټ په ټاکلیو ۵۰ اورونو کې د ۷ ویکټو پر زیان خپلې سيالې ايرلينډ لوبډلې ته ۳۱۵ منډې جوړې کړې او ۳۱۶ منډې هدف يې ورته وټاکه.
په ځواب کې يې ايرلينډ لوبډلې د خپلو ټولو لوبغاړو په سوځېدو يوازې ۱۲۴ منډې جوړې کړې او د ۱۹۱ منډو په ستر توپیر يې دغه لوبه بايلوده.
د دې سيالۍ په پايله کې فيصل خان شينوزاده، د ښې توپوهنې له امله، چې ۱۶۳ منډې يې جوړې کړې وې، د لوبې د غوره لوبغاړي په توګه وټاکل شو.
