افغان ووشو کارانو د دوو مډالونو ګټلو وروسته هېواد ته راستانه شول او د ورزش ادارې له لوري يې تود هرکلی وشو
د ووشو شانګهای سازمان اسیایي سیالیو څخه مډال ګټونکي افغان ورزشکاران شهزاده صافی او خالد هوتک هېواد ته راستانه شول او د ورزش ادارې له لوري يې تود هرکلی وشو.
د ښه راغلاست په دغو مراسمو کې د المپیکي چارو رئيس داد محمد پاينده اختري، د ووشو ملي فدراسيون رئيس بلبل شاه خالد، د ياد فدراسيون مسوولينو، ورزشکارانو او مينوالو ګډون کړی وو.
د ووشو شانګهای سازمان په دغو اسيايي سياليو کې افغان ورزشکار شهزاده صافي په ۵۶ کیلو ګرامه وزن کې په پرلپسې قزاقستاني او هانکانګي سیالانو ته په ماتې ورکولو سره د سپینو زرو مډال وګاټه او بل افغان ورزشکار محمد خالد هوتک په ۷۰ کیلو ګرامه وزن کې له مبارزې پرته د برنزو مډال وګاټه.
یادې سیالۍ د چین په کوربتوب د ۱۸ هېوادونو په ګډون د روانې میلادي میاشتې د ۲۶مې نېټې څخه تر ۲۹مې نېټې پورې ترسره شوې، چې د افغانستان په استازولي ۶ورزشکارانو ګډون درلود.
