په هلمند کې د کبډي رمضان جام سياليو اتلولي د کجکي ولسوالۍ لوبډلې خپله کړه
د هلمند ولايت د مرکز لښکرګاه په نظري ورزشي کلب کې د کبډي رمضان جام سياليو اتلولي د کجکي ولسوالۍ لوبډلې خپله کړه.
د دغو سيالو د پای په مراسمو کې د ياد ولايت ورزشي مسولينو، د کلبونو روزنکو، ورزشکارانو، قومي مشرانو، د رسنيو مسولينو، د مرکز او ولسواليو سلګونو نندارچيانو ګډون کړی و.
د نوموړو سيالو پايلوبې ته د کجکي او ګرمسېر ولسواليو لوبډلو لار موندلې وه، چې په پايله کې د کجکي ولسوالۍ لوبډله وتوانېده، چې خپلې سيالې لوبډلې ته د ۲ نومرو په توپير ماتې ورکړي او لومړی مقام خپل کړي.
د يادونې وړ ده چې په دغو سياليو کې اتو لوبډلو ګډون کړی و او څه باندې ۲۲ ورځې يې دوام وکړ.
