د ورزشي سازمانو او سبکونو د خپل منځي اختلافونو د حل لپاره ١٥ کسيزه کمېټه وټاکل شوه

د بدني روزنې او ورزش عمومي ریاست د جلساتو په تالار کې د المپيک ملي کمېټې او سپورټ عمومي رئيس مولوي عبدالودود حقاني په مشرۍ د ازادو سياليو ورزشي سازمانونو او سبکونو د خپل منځي شخړو د حل لپاره ناسته وشوه.

په دې ناسته کې د المپيک ملي کمېټې او سپورټ عمومي رئيس مولوي عبدالودو حقاني، د بدني روزنې او ورزش عمومي ریاست فني او مسلکي مرستيال حافظ احمد جان ځدراڼ، د فدراسيونونو امر محمد اعظم کوهي او د زده کړو امر حميد الله صافي او د ازادو سياليو سازمانونو او بېلابېلو سبکونو استازو شتون درلود.

په دې ناسته کې د ورزش ادارې رهبري او د ورزشي سازمانونو او سبکونو استازو د يادو ورزشونو د ستونزو او خپل منځي اختلافاتو په حل خبرې وکړې.

د المپيک ملي کمېټې او سپورټ عمومي رئيس مولوي عبدالودو حقاني يادې ناستې ته په خبرو کې وويل؛ ټول ورزشونه بايد تر يوه واحد چتر لاندې خپل فعالیت وکړي په خبره يې؛ د ټولو هغو موازي ورزشونو مخه بايد ونيول شي چې په غير قانوني ډول او له جواز پرته فعاليت کوي.

ښاغلي حقاني د يادو ورزشونو مسوولینو ته په دې برخه کې د هر راز همکارۍ ډاډ ورکړ.

په دې ناسته کې د ورزش ادارې په مشرۍ د يادو شويو ورزشونو د ستونزو د حل لپاره يوه ١٥ کسيزه کمېټه وټاکل شوه، چې پنځه تنه د ورزش ادارې، پنځه تنه د سازمانونو او پنځه تنه له بېلابېلو سبکونو څخه پکې غړيتوب لري.

يادې کمېټې ته ١٥ ورځې وخت ورکړل شو؛ ترڅو د دغو ورزشونو د منازعاتو د حل لپاره جامع طرحه چمتو او راتلونکې ناسې ته يې د بحث لپاره وړاندې کړي.