خوست؛ ګربز ولسوالۍ کې د ۱۷ لوبډلو ترمنځ د ټېپ بال کرکټ سیالۍ پیل شوې
د خوست ولایت د بدني روزنې او ورزش امریت اړوند د ټېپ بال کرکټ فدراسیون د استازولي له لوري د یادولایت په ګربز ولسوالۍ کې د ۱۷ لوبډلو ترمنځ د ټېپ بال کرکټ سیالۍ پیل شوې.
د یادو سیالیو لومړۍ لوبه د معصوم او شیخ امیر تندر لوبډلو ترمنځ ترسره شوه. معصوم لوبډلې د لوبې پچه وګټله او لومړی یې د توپ وهنې پرېکړه وکړه، چې په ټاکلو اتو اورونو کې یې د ۴ لوبغاړو په له لاسه ورکولو سره خپلې سیالې لوبډلې ته د ۱۴۸ منډو هدف وټاکه. شیخ امیر تندر لوبډلې یاد هدف د لوبې په اووم اور کې پوره کړ او اوو ویکټو یې خپلې سیالې لوبډلې ته ماتې ورکړه.
دغه سیالۍ د یادې ولسوالۍ د منتخبې لوبډلې لپاره د غوره لوبغاړو ټاکلو په موخه پیل شوي دي، چې ۲۰ ورځې به دوام وکړي.
