پکتيکا؛ سروضه ولسوالۍ کې د نيزه وهنې سيالۍ وشوې
د پکتيکا ولايت د بدني روزنې او ورزش آمريت په همغږۍ، د وزلوبې، نيزه وهنې او سیمه ییزو لوبو فدراسيون د استازولۍ له لوري د سروضه ولسوالۍ په سلطانو کلي کې د ۱۴ لوبډلو ترمنځ د نيزه وهنې سيالۍ وشوې.
د يادو سياليو په پايله کې اتفاق کلب لوبډلې د ۲۸ امتيازونو په خپلولو سره لومړی، يوسف خېلو لوبډلې د ۲۶ امتيازونو سره دويم او سروضه ولسوالۍ لوبډلې د ۲۴ امتيازونو په ترلاسه کولو سره درېيم مقام خپل کړ.
دا سيالۍ د يادې ولسوالۍ وگړو لپاره د سالمې تفريح برابرولو په موخه ترسره شوې، چې په پای کې اتلې لوبډلې ته يو سېرلی، دويم او درېيم مقام گټونکو لوبډلو ته کپونه ورکړل شول.
