بلخ؛ دهدادي ولسوالۍ کې د فوټسال سياليو پايلوبه ترسره شوه
د فوټسال سيالۍ د بلخ ولايت د مرکز او ولسواليو د لسو ټيمونو ترمنځ د دهدادي ولسوالۍ په کوربه توب د بلخ ولايت د بدني روزنې او ورزش رياست تر څارنې لاندې د يوې اوونۍ لپاره پیل شوې وې.
په پاى کې د همدرد فوټسال لوبډلې لومړى، هاشمي ياران دويم او بابا کهنه درېيم مقام خپل کړ.
په دغو سیالیو کې د بلخ ولایت د بدني روزنې او ورزش ریاست د رهبري پلاوي، د ګډون کوونکو لوبډلو مسوولینو او د فوټسال یو شمېر مینه والو ګډون کړی و.
د بلخ ولايت د بدني روزنې او ورزش رياست فني او مسلکي مدير محمد اصف علمي وويل، چې د دغو سياليو له پيلولو موخه د تنکيو ځوانانو د استعدادونو هڅونه او وده ده.
په پای کې د دغو سياليو اتلانو ته د اتلولۍ کپ، مډالونه، ستاينليکونه او ورزشي جامې ووېشل شوې.
