په هلمند کې د فوټسال رمضان جام سيالۍ پيل شوې
د هلمند ولايت په مرکزي جمنازيوم کې د فوټسال د ۳۲لوبډلو ترمنځ د رمضان جام سيالۍ پيل شوې.
د يادو سياليو د پيل سيالي د برومند او الماس لوبډلو ترمنځ ترسره شوه، چې په پايله کې برومند لوبډلې خپلې سيالې لوبډلې ته د ۴-۱ ګولونو په توپير ماتې ورکړه او بريا يې ترلاسه کړه.
همداراز د نن ورځې دويمې سيالۍ ته د قيس غني او احمدي لوبډلې ميدان ته ښکته شوې، چې په ټاکلي وخت کې قيس غني لوبډلې خپله سياله لوبډله د ۸_۲ ګولونو په توپير له مخې لرې کړه او بريا يې خپله کړه.
دغه سيالۍ چې قيس غني سپانسر کړې، په ناک اوټ حذفي شکل ترسره کېږي او د روژې مبارکې مياشتې تر وروستيو ورځو پورې به دوام وکړي.
