د هېواد د ورزش ریاست پلاوي د جوزجان له والي سره وکتل
د هېواد د بدني روزنې او سپورت ریاست پلاوي د جوزجان ولایت له والي قاري ګل حیدر شفق سره وکتل.
په یاده کتنه کې د جوزجان والي قاري ګل حیدر شفق، د بدني روزنې او ورزش د عمومي ریاست د ورزشي چارو سلاکار قاري حیات الله رحماني، د مشورتي بورډ غړي سید مبشر هاشمي، حقوقي سلاکار سید رسول افغان حضور درلود، چې ترمنځ یې د ورزشي مسایلو او د ورزشکارانو د ستونزو په اړه هر اړخیز بحث او د نظرونو تبادله وشوه.
د بدني روزنې او سپورت عمومي ریاست او المپیک ملي کمیټې پلاوي د جوزجان له والي قاري ګل حیدر شفق سره د دغه ولایت د ورزشکارانو د ستونزو، ننګونو او د بخدي وزلوبې میدان په اړه خبرې وکړې او د حل په برخه کې یې د همکارۍ غوښتنه وکړه.
ښاغلي ګل حیدر شفق د بدني روزنې او ورزش عمومي ریاست پلاوي ته د ښه راغلاست ووایه او زیاته يې کړه چې د بخدي د وزلوبې میدان موضوع به د ولایت مقام په راتلونکې اداري غونډه کې مطرح کړي او د غونډې د ګډونوالو د نظریاتو له اوریدو سره به لازم اجرآت ترسره شي.
همدارنګه ښاغلي شفق زیاته کړه چې د جوزجان سیمه ییزه اداره به تل د ورزشکارانو ترڅنګ چې ډېری یې ځوانان دي، ولاړه وي او د ورزش په برخه کې به هر څومره چې ممکن وي مرستې او همکارۍ ته به دوام ورکړي.
دا غونډه په داسې حال کې جوړه شوه چې تر دې غونډې مخکې د ورزش امريت او د ورزشي فدراسيونونو له مسوولينو او د ورزشي فدراسيونونو له استازو سره وکتل او د هغوى په ستونزو يې خبرې وکړې.
