د اتلتيک ملي فدراسیون درې کسيزه ډله په اسیايي سیالیو د ګډون په موخه ټایلنډ ته روانه شوه
د افغانستان د بدني روزنې او ورزش عمومي رياست اړوند د اتلتيک فدراسيون دوو ورزشکارانو او يوه استازي د اسيا په کچه د اتلتيک فدراسيون اړوند ځغاستې سبک په پنځه ويشتم پړاو سياليو کې د ګډون په موخه د ياد رياست له عمومي رييس الحاج مولوي عبدالودود حقاني سره تر خدای پامانۍ وروسته د تايلند هيواد بانکوک ښار پر لور روانه شوه.
د المپيک ملي کمېټې او سپورټ عمومي رييس د مخې پر مهال په يادو سياليو کې ګډون کوونکو ورزشکارانو ته سپارښتنه وکړه چې په دغو سياليو کې د يوه اسلامي نظام ښه استازولي وکړي او دوی ته يې د هر ډول ملاتړ ډاډ ورکړ.
تمه ده چې په دغو سياليو کې به ويس احمد په ۲۰۰ مترۍ او سفر علي احمدي په ۱۰۰ مترۍ کې سيالي ترسره کړي.
دغه سيالۍ چې هر څلور کاله وروسته ترسره کېږي، سږ کال پکې د اسيا په کچه ۴۷ هيوادونه ګډون کوي او د جولای میاشتې له ۱۰ مې نېټې څخه تر ۱۷ مې نېټې پورې به دوام وکړي.
هېره دې نه وي چې تر دې مخکې د اتلتيک فدراسيون اړوند افغان ورزشکار سيد جلال جيلاني په نړيوالو سياليو کې چې په جرمني هيواد کې ترسره شوې د طلا مډال ترلاسه کړی و.
د يادونې وړ ده چې د دغو سياليو په لړ کې به د اسيا په کچه د اتلتيک فدراسيون رييس هم وټاکل شي.
