هلمند؛ لمر لوبډلې د ګرمسېر ولسوالۍ د فوټبال حذفي جام سیالیو اتلولي خپله کړه
د هلمند ولایت د بدني روزنې او ورزش امريت په همغږۍ د فوټبال فدراسیون له لوري په ګرمسېر ولسوالۍ کې د فوټبال ناک اوټ يا حذفي سيالۍ، چې دوې اوونۍ وړاندې د ١٤ لوبډلو ترمنځ پيل شوې وې د لمر لوبډلې په ګټه پاى ته ورسېدې.
د دغو سياليو په پايلوبه کې د لمر لوبډلې انوري لوبډلې ته د ٤-٢ ګولونو په توپیر ماتې ورکړه او د دې سياليو اتلولي يې خپله کړه.
دغه سیالۍ، چې د ګرمسېر ولسوالۍ د امیر بلند اغا په فوټبالي حوزه کې ترسره شوې سیال افغان، لغمان شاهي، اتحاد، انوري، حبیبي، اریانا، افغان، خوشحال، لمر، العرب، وفا، رضوان، اقبال او نوي ځوانانو لوبډلې پکې ولوبېدلې.
يادې سیالۍ، چې د ځوانانو تر منځ اتحاد، اتفاق او ورزش ته د هغوى د هڅولو په موخه پیل شوې وې، په پايله کې يې سيف الدین د غوره لوبغاړي، محمد نادر د غوره ګول وهونکي او ميرويس د غوره ګول ساتونکي جايزې تر لاسه کړلې.
په پاى کې د لومړي او دويم مقام ګټونکو لوبډلو او غوره لوبغاړو ته جايزې هم ورکړل شوې.
