د ورزش ادارې عمومي رئیس مولوي احمد الله وثیق د اندونیزیا د سفیر ښاغلي بوډي د ناروغۍ پوښتنه وکړه
د ورزش ادارې عمومي رئیس مولوي احمد الله وثیق او د بدني روزنې او سپورټ عمومي ریاست فني او مسلکي مرستیال حافظ احمد جان ځدراڼ د اندونیزیا هیواد د سفیر ښاغلي بوډي د ناروغۍ پوښتنې ته ورغلل او هغه ته یې د روغ صحت دعا وکړه.
ښاغلي وثیق د خپلو خبرو په جریان کې د اندونیزیا سفیر ته د روغ صحت هیله څرګنده کړه او زیاته یې کړه، چې د دوی ملاتړ د افغانستان له ورزش څخه خورا ګټور ثابت شوی او په اینده کې یې هم د ورته اړیکو دوام ته ژمنتیا او هیله څرګنده کړه.
ښاغلي بوډي د مۍ پر پنځمه په افغانستان کې د زړه بریالی عملیات ترسره کړ. ښاغلي بوډي په خبرو کې خوښي وښوده، چې په افغانستان کې د ورته عملیاتو اسانتیاوې موجودې دي او هم یې په خپلو خبرو کې د افغانستان د ورزش ادارې له رهبري مننه وکړه، چې د نوموړي د ناروغۍ پوښتنه یې وکړه.
باید یادونه وکړو، چې د اندونیزیا سفارت د افغانستان د بډمنټون فدراسیون د سږ کال مالي مصارف پر غاړه اخیستي دي او په راتلونکې یې هم د افغانستان د ورزشي برنامو د حمایت ژمنه کړې ده.
