خوست کې د ۵۰ لوبډلو ترمنځ د ټېپ بال کرېکټ سيالۍ پای ته ورسېدې
د خوست ولايت د بدني روزنې او ورزش په همکارۍ د ياد ولايت په مرکز کې د ۵۰ لوبډلو ترمنځ د ټېپ بال کرېکټ سيالۍ، چې دوې نيمې مياشتې مخکې پيل شوې وې د پيران زلمي لوبډلې په اتلولۍ پای ته ورسېدې.
د يادو سياليو پايلوبه د پيران زلمي او اکبر زلمي لوبډلو ترمنځ ترسره شوه، اکبر زلمي لوبډلې د لوبې پچه وگټله او لومړی يې توپ وهنه غوره کړه، چې په ټاکلو اتو اورونو کې د نهو لوبغاړو په سوځېدو سره سیالې لوبډلې ته د ۱۰۲ منډو هدف وټاکه، په مقابل کې پيران زلمي لوبډلې ياد هدف په اورم اور کې د څلورو لوبغاړو په سوځېدو سره ترلاسه کړ او لوبه يې د شپږو ویکټو په توپير وگټله.
