کابل؛ د نجیب تلاش خيريه بنسټ د بډمنټون ملي ټاکنيزو سياليو مالي ملاتړ په غاړه واخيست
د المپيک، بدني روزنې او ورزش عمومي رياست اړوند د بډمنټون ملي فدراسیون او د نجیب تلاش خيريه بنسټ ترمنځ د بډمنټون راتلونکو ملي ټاکنيزو سياليو د مالي ملاتړ او همکارۍ تړون لاسلیک شو.
ياد تړون د هېواد ورزش ادارې د فني او مسلکي مرستيال حافظ احمد جان ځدراڼ او د ياد رياست د رهبرۍ غړو، په شتون کې د نجيب تلاش خيريه بنسټ مشر نجیب الله تلاش او د بډمنټون ملي فدراسیون رئیس ارشاد الحق صديقي ترمنځ لاسليک شو، چې له مخې به يې، ياد بنسټ د بډمنټون راتلونکې ملي ټاکنيزې سيالۍ مالي ملاتړ ترسره کړي.
د ياد تړون د لاسليک پر مهال د هېواد ورزش ادارې فني او مسلکي مرستيال حافظ احمد جان ځدراڼ، په ورزش او نورو برخو کې د ياد بنسټ د کړو خدمتونو يادونه وکړه او زياته يې کړه، چې دوی د ورزش د ودې او پرمختګ په برخه کې پراخه ونډه اخيستې او د ورزشکارانو ملاتړ يې کړی دی.
دغه راز نوموړې له خصوصي سکتور څخه غوښتنه وکړه، چې په هېواد کې د ورزش او ورزشکارانو د پرمختګ لپاره د ورزشکارانو او ورزشي برنامو مالي ملاتړ وکړي، تر څو ورزش لا پرمختګ وکړي او ورزشکاران وکولی شي، چې هېواد ته وياړونه راوړي.
همدارنګه د نجیب تلاش خيريه بنسټ اجرايه مدير نويد قادري وويل، د نجيب تلاش خيريه بنسټ مشر د ورزش سره د ځانګړې مينې له امله وخت نا وخت د ورزشي برنامو ملاتړ کړی او دا دی يو ځل بيا يې هم د دې سياليو ملاتړ وکړ.
دغه راز نوموړي وويل، موږ به په راتلونکي کې هم د ورزشي برنامو او ورزشکارانو مالي ملاتړ ته دوام ورکړو.
د ويلو ده، چې د بډمنټون ملي ټاکنيزې سيالۍ به په نږدې راتلونکي کې ترسره شي، چې د ترسراوي، کره نېټه به يې وروسته روښانه شي.
