هلمند؛ گرمسېر ولسوالۍ کې د ۱۲ لوبډلو ترمنځ د فوټبال سيالۍ پای ته ورسېدې
د هلمند ولايت د بدني روزنې او ورزش آمريت اړوند د فوټبال فدراسيون د استازولۍ له لوري د گرمسېر ولسوالۍ په درويشانو فوټبال حوزه کې د ۱۲ لوبډلو ترمنځ د فوټبال سيالۍ د مسلم لوبډلې په اتلولۍ پای ته ورسېدې.
د دغو سياليو پايلوبه د مسلم او جهان لوبډلو ترمنځ ترسره شوه، چې په ټاکلي وخت سيالي ۱/۱ مساوي پای ته ورسېده، خو په پنالټيانو کې مسلم لوبډلې خپلې سيالې لوبډلې ته د ۵ پر ۴ گولونو په توپير ماتې ورکړه او اتلولي يې وگټله.
د يادو سياليو موخه د فوټبال ورزش ته وده ورکول و، چې دوې اوونۍ يې دوام وکړ.
