د بايسکل ځغلونې ملي ټاکنيزې سيالۍ د ۲۵ بايسکل ځغلونکو پر ټاکلو پای ته ورسېدې

د المپيک، بدني روزنې او ورزش عمومي رياست اړوند د بايسکل ځغلونې ملي فدراسیون له لوري د هېواد له ۱۴ ولايتونو څخه د ۵۵ بايسکل ځغلونکو ترمنځ د سرکوي( جاده يي) سبک ملي ټاکنيزې سيالۍ، چې درې ورځې وړاندې له کابل څخه تر ننګرهاره پورې واټن کې پيل شوې وې، د بايسکل ځغلونې ملي لوبډلې ته د ۲۵ لوبغاړو په ټاکلو پای ته ورسېدې.

دغه سيالۍ په درېيو پړاونو کې ترسره شوې، چې لومړی پړاو يې له کابل څخه د لغمان ولايت تر دوه لارې، دويم پړاو يې د ننګرهار ولايت د بدني روزنې او ورزش رياست له انګړ تر تورخم او درېيم پړاو يې بیا د دې ولايت د ورزش رياست له انګړ تر ګامبيري ډاګه پورې ترسره شو، چې په پايله کې يې ۲۵ تنه د بايسکل ځغلونې ملي فدراسيون ملي لوبډلې ته وټاکل شول.

دغه راز په يادو سياليو کې د کابل ولايت څخه محمد شريف يعقوبي د ۷۵ نمرو په ترلاسه کولو سره لومړی مقام، د خوست ولايت رحمت الله ځلاند د ۶۵ نمرو سره دويم مقام او نقيب الله طوطاخيل د کابل ولايت څخه د ۶۴ نمرو په ترلاسه کولو درېيم مقام خپل کړ، چې د فدراسيون له لوري ورته کپونه, مډالونه او ستاينليکونه ورکړل شول.

د دې سياليو د پای په مراسمو کې د هېواد ورزش ادارې د المپیکي چارو رئيس داد محمد پاينده اختري، اداري مشاور محمد يوسف افتخار، د دې فدراسيون سرپرست رئیس سيد نبي الله سادات، د ننګرهار ولايت د بدني روزنې او ورزش رياست رئيس عبدالسلام وزيروال، د هېواد ورزش ادارې او د ننګرهار بدني روزنې ورزشي مسوولينو او ورزشکارانو ګډون کړی وو.

د دې سياليو د پای په مراسمو کې د ننګرهار ولايت د بدني روزنې او ورزش رياست رئيس عبدالسلام وزيروال ټولو راغلو ورزشکارانو او مسوولينو ته د ښه راغلاست ترڅنګ، د دوې د فعاليتونو ستاينه وکړه او د دې ملي سياليو کوربتوب يې خپل وياړ وباله.

دغه راز د هېواد ورزش ادارې د المپیکي چارو رئيس وويل، دا د شکر ځای دی، چې زموږ ورزشکاران په ډېرو کمو امکاناتو په نړيوال سياليو کې وياړونه ګټې او هېواد ته افتخارات راوړي.

دغه راز نوموړي، د بايسکل ځغلونې لوبه يوه تاريخي او پخوانۍ لوبه وبلله او د دې سياليو د فدراسيون او د هېواد ورزش ادارې له مسوولينو يې د دې سياليو په برابرولو او په ښه توګه سرته رسولو مننه وکړه.

همدارنګه د بايسکل ځغلونې ملي فدراسيون سرپرست رئيس سيد نبي الله سادات له ټولو مسوولينو د مننې ترڅنګ، د دې سياليو په اړه بشپړ معلومات ورکړل.

د ويلو ده، چې دې سياليو د کوهستاني يا غرني سبک سيالۍ د ۲۸ لوبغاړو ترمنځ په کابل کې ترسره شوې، چې په پايله کې يې ۱۰ تنه ملي لوبډلې ته وټاکل شول او لايق الله شايق فضيلي د باميان ولايت څخه پکې لومړی مقام محمد ذبيد رحماني او حکمت الله طيبي د هرات ولايت څخه په ترتيب دويم او درېيم مقام ترلاسه کړ، چې د مسوولينو له لوري ورته کپونه، مډالونه او ستاينليکونه ورکړل شول.