د المپيک په اسيايي سياليو کې د ګډون لپاره د ورزشکارانو د ټاکنې په موخه د اتلتیک سیالۍ وشوې
د المپيک، بدني روزنې او ورزش عمومي رياست اړوند اتلتيک ملي فدراسيون له لوري، د اسيايي سياليو په موخه چې په جاپان هېواد کې به ترسره شي، د شپږو ورزشکارانو ترمنځ له کابل ولايت څخه د لوګر تر محمد اغې ولسوالۍ پورې، چې ۴۲ کيلو متره واټن کېږي د ماراتون سبک ځغاستې سیالۍ وشوې.
په دغو سياليو کې شپږو ورزشکارانو ګډون کړی و، چې په پايله کې مجتبی فقير زاده لومړی او الهام الدين سراج زوی دويم مقام تر لاسه کړ.
دغه سيالۍ په جاپان هېواد کې د اسيا المپيک سياليو لپاره د غوره ورزشکارانو موندلو په موخه وشوې، چې له افغانستان څخه به پکې د همدغو سياليو د لومړي مقام ګټونکی مجتبی فقير زاده چې دغه واټن يې په درې ساعته او دوه دقيقو کې طی کړ ګډون وکړي.
