بامیان کې د ۱۹ لوبډلو ترمنځ د فوټسال سیالۍ پای ته ورسېدې
د بامیان ولایت د بدني روزنې او ورزش امریت اړوند د فوټبال فدراسیون د استازولۍ له لوري د یاد ولایت ښار په اتحاد جمنازیوم کې د ۱۹ لوبډلو ترمنځ د رمضان جام په نوم د فوټسال سیالۍ د وي ای پي لوبډلې په اتلولۍ پای ته ورسېدې.
د دغو سیالیو په پایلوبه کې وي ای پي لوبډلې خپلې سیالې برایت استار لوبډلې ته د ۵/۳ ګولونو په توپير ماتې ورکړه او اتلولي یې خپله کړه.
د یادو سیالیو موخه د روژې مبارکې میاشتې نمانځل او د ځوانانو ترمنځ یووالی رامنځته کول و، چې دوې اونۍ یې دوام وکړ.
د سیالیو په پای کې د ورزش مسوولینو له لوري غوره لوبډلې ته د اتلولۍ جام او غوره لوبغاړو ته ورزشي ډالۍ ورکړل شوې.
