بلخ کې د ۱۴۰ ورزشکارانو ترمنځ د کيک بوکسينګ اتلسم پړاو سيالۍ وشوې
د بلخ ولايت په مرکز مزارشريف ښار کې د هېواد له ۱۳ ولايتونو څخه د ۱۴۰ ورزشکارانو ترمنځ د کيک بوکسينګ اتلسم پړاو سيالۍ وشوې.
د افغانستان د کيک بوکسينګ ملي فدراسيون د مسوولينو په وينا دغه سيالۍ د کيک بوکسينګ ورزش ته د ودې ورکول، د غوره استعدادونو موندل او د بېلابېلو ولايتونو ورزشکارانو ته د سياليو زمينه برابرول و.
د دغو سياليو په پايله کې د بلخ ولايت لومړی، کندز دويم او سمنګان ولايت بیا درېيم مقام خپل کړ.
د دغو سياليو د پای په مراسمو کې غوره ورزشکارانو ته مډالونه، ستاينليکونه او چمتو شوې ډالۍ ورکړل شوې.
دغه سيالۍ په داسې حال کې ترسره کېږي، چې د هېواد په کچه د ورزشي لوبو جوړول د سالمو سياليو د پیاوړتیا، د نویو استعدادونو د موندنې او په بېلابېلو ورزشي څانګو کې د لوبغاړو د تخنيکي کچې د لوړولو څخه ګڼل کېږي.
