جاپان کې د افغان ورزشکارانو په ګډون شلم پړاو آسیایي المپیکي سیالۍ پیل شوې
د المپیک آسیایي کمېټې له لوري شلم پړاو آسیایي المپیکي سیالۍ د جاپان په کوربتوب د یاد هېواد په ایچي- ناګویا ښار کې پیل شوې او د راتلونکې اکتوبر میاشتې تر څلورمې نېټې به دوام وکړي.
په دغو سیالیو کې له ٤٥ آسیایي هېوادونو څخه له ١١ زرو زیاتو ورزشکارانو ګډون کړی دی، چې په ٤١ بېلابېلو ورزشي رشتو کې به سیالۍ ترسره کړي.
ورته مهال، له افغانستان څخه په دغو سیالیو کې په اتو بېلابېلو ورزشي رشتو کې ٣٤ ورزشکارانو ګډون کړی دی.
دغه راز له افغانستان څخه د کرېکټ په برخه کې هم د افغان ابدالیانو ٢٤ کسیزه لوبډله د دغو سیالیو برخه ده.
د یادونې وړ ده، چې سبا به د ووشو په برخه کې محمد جعفر سلطاني، شهزاده صافی، محمد خالد هوتک او حامد اشرفي له خپلو سیالانو سره د لوبې ډګر ته ښکته شي.
دا په داسې حال کې ده، چې د اسیايي المپیکي سیالیو نولسم پړاو د چین په کوربتوب د یاد هېواد په هانګژو ښار کې ترسره شو، چې افغان ورزشکارانو د تکواندو، کورش، ووشو او کرېکټ په برخه کې پنځه مهم مډالونه ترلاسه کړي و.
