غزني؛ اندړو ولسوالۍ کې د ۴۸ نېزه وهونکو ترمنځ د نېزه وهلو سیالۍ ترسره شوې
د غزني ولایت د بدني روزنې او ورزش امریت اړوند د وزلوبې، نېزه وهنې او دودیزو لوبو ملي فدراسیون د استازولۍ له لوري د یاد ولایت په اندړو ولسوالۍ کې د ۴۸ نېزه وهونکو ترمنځ د نېزه وهلو سیالۍ ترسره شوې، چې یوه ورځ یې دوام وکړ.
د دغو سیالیو په پایله کې احمد خان باوري لوبډلې د ۶۴ امتیازونو په ترلاسه کولو سره لومړی، محمد انور اندړ لوبډلې د ۴۶ امتیازونو په ترلاسه کولو دویم او رحمت الله بیدار لوبډلې د ۳۶ امتیازونو په ترلاسه کولو سره بیا درېیم مقام خپل کړ.
د یادو سیالیو موخه سیمه ییزو او دودیزو لوبو ته وده ورکول و، د سیالیو په پای کې غوره نېزه وهونکو ته چمتو شوې ډالۍ ورکړل شوې.
