قرغيو ولسوالۍ لوبډلې د لغمان ټېپ بال کرېکټ سياليو اتلولي وگټله
د لغمان ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري او د AWEC مؤسسې په مالي ملاتړ د ياد ولايت په مرکز هندي پارک لوبغالي کې د ۶ لوبډلو ترمنځ د ټېپ بال کرېکټ سیالۍ د قرغيو ولسوالۍ لوبډلې په اتلولۍ پای ته ورسېدې.
د يادو سياليو پايلوبه د قرغيو او الينگار ولسواليو لوبډلو ترمنځ وشوه، د لوبې پچه قرغيو ولسوالۍ لوبډلې وگټله او لومړی يې د توپ وهنې پرېکړه وکړه، چې په ټاکلو ۱۰ اورونو کې يې د ۵ لوبغاړو په سوځېدو سره خپلې سيالې لوبډلې ته د ۱۵۰ منډو هدف کېښود، په ځواب الينگار ولسوالۍ لوبډلې د ټولو اورونو په لوبولو سره ۱۲۵ منډې او لوبه يې د ۲۵ منډو په توپير وبايلله.
دا سیالۍ د سالمې تفريح برابرولو او ورزش ته د ځوانانو هڅولو په موخه وشوې، چې ۵ ورځې يې دوام وکړ.
