ننګرهار؛ بټي کوټ ولسوالۍ کې د ۴۴ لوبډلو ترمنځ د ټېپ بال کرېکټ سیالۍ پای ته رسیدل
د ننګرهار ولایت د بدني روزنې او ورزش رياست اړوند د ټېپ بال کرېکټ فدراسيون د استازولۍ له لوري د ياد ولايت په بټي کوټ ولسوالۍ کې د ۴۴ لوبډلو ترمنځ د ټېپ بال کرېکټ سيالۍ د سمسور لوبډلې په اتلولۍ پای ته ورسیدې.
د دغو سياليو پايلوبه د وفيع الله او سمسور لوبډلو ترمنځ ترسره شوه، وفيع الله لوبډلې د پچې په ګټلو سره د توپ وهنې پرېکړه وکړه، چې په ټاکلو لسو اورونو کې د پنځو لوبغاړو په سوځېدو سره مقابلې لوبډلې ته د ۱۴۴ منډو هدف وټاکه. په ځواب کې د سمسور لوبډلې ټاکل شوې هدف د لوبې په اتم اور کې پرته د کوم لوبغاړي د سوځېدو څخه پوره کړ او د لسو ويکتو په توپير يې اتلولي وګټله.
د يادو سياليو موخه فکري رغونه او ځوانانو ته د تفريح برابرول و، چې يوه مياشت يې دوام وکړ او په پای کې اتلې لوبډلې ته يو عراده بايسکل ورکړل شو.
