ننګرهار؛ مومند درې ولسوالۍ کې د ٦٤ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په مومند درې ولسوالۍ کې د ٦٤ لوبډلو ترمنځ د ټېپ بال کرېکټ سیالۍ د کینګ سټارز لوبډلې په اتلولي پای ته ورسېدې.
د یادو سیالیو پایلوبه د باسول لمر الف او شینوارو کینګ سټارز لوبډلو ترمنځ ترسره شوه. د لوبې پچه باسول لمر لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د درېیوو ویکټو په زیان خپلې سیالې لوبډلې ته د ١٣٥ منډو هدف وټاکه. کینګ سټارز لوبډلې ټاکلی هدف پرته له کوم زیان د لوبې په شپږم اور کې ترلاسه کړ او د لسو ویکټو په توپیر یې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې دوې میاشتې یې دوام وکړ.
