هرات؛ چشت ولسوالۍ کې د ۱۲ لوبډلو ترمنځ د فوټبال دوستۍ ليګ پای ته ورسېد
د هرات ولايت د بدني روزنې او ورزش رياست په همکارۍ او چشت ولسوالۍ ورزشي امريت په نوښت په يادې ولسوالۍ کې د ۱۲ لوبډلو ترمنځ د فوټبال دوستۍ ليګ د جوانان پيرروزي لوبډلې په اتلولۍ پای ته ورسېد، چې يوه مياشت يې دوام وکړ.
د دغو سياليو په پايلوبه کې جوانان پيروزي لوبډلې خپلې سيالې پيروزي مرکز لوبډلې ته د ۱/۰ ګول په توپير ماتې ورکړه او اتلولي يې خپله کړه.
د يادو سياليو موخه د فوټبال لوبو ته وده ورکول او ورزش ته د ځوانانو هڅول و، د سياليو په پای کې غوره لوبډلې او لوبغاړو ته چمتو شوې ډالۍ ورکړل شوې.
