په خوست کې د لکڼو والیبال رمضان جام سیالۍ پیل شوې
د خوست ولایت د بدني روزنې او ورزش امریت او والیبال فدارسیون په همغږۍ د لکڼو ځوانانو له خوا د ۳۰ لوبډلو ترمنځ د رمضان جام سیالۍ پيل شوې.
په همدې موخه په جوړو شویو مراسمو کې،چې د لکڼو په ایوب خېلو سیمه کې جوړ شوي وو، د یاد ولایت د بدني روزنې او سپورټ امریت مسولینو، قومي مشرانو ، ځوانانو او د ورزش ګڼو مینوالو برخه اخیستې وه.
په پیل کې د خوست ولایت ورزشي مسولینو راغلو مېلمنو ته د ښه راغلاست ترڅنګ د یادو سیالیو په پیل کېدو خوښي څرګنده کړه او له ځوانانو یې غوښتنه وکړه، چې سیالۍ دې د ورورولۍ او صمیمیت په فضا کې ترسره کړي.
د نوموړي جام لومړۍ سیالي د کابل او خوست فیضو لوبډلو ترمنځ ترسره شوه، چې په پایله کې کابل لوبډلې خپلې سیالې لوبډلې ته د ۳-۲ میدانونو په توپیر ماتې ورکړه او لومړۍ بریا یې خپله کړه.
هېره دې نه وي، چې په دغه جام کې د خوست ولایت د ۲۵ لوبډلو په ګډون د خیبر پښتونخوا له بنو، کابل، پکتیا او له میدان وردګ څخه لوبډلو ګډون کړی، چې د روژې مبارکې میاشتې تر وروستیو به دوام وکړي.
