کابل کې د لويانو ورزشکارانو ترمنځ د تکواندو ټاکنیزې سيالۍ پيل شوې
د کابل ولايت د بدني روزنې او ورزش رياست په همکارۍ د تکواندو ملي فدراسيون له لوري د کابل له ۱۵ کلبونو څخه د ۱۰۰ ورزشکارانو ترمنځ د لويانو ورزشکارانو په کټګورۍ کې د تکواندو ديارلسم پړاو ټاکنیزې سيالۍ پيل شوې، چې دوې ورځې به دوام وکړي.
دغه سيالۍ د لويانو ورزشکارانو په عمري کټګورۍ او اتو وزني کټګوريو ترسره شي، چې په پايله کې به ۳۲ ورزشکاران د کابل ولايت د تکواندو لويانو ورزشکارانو منتخبې لوبډلې ته وټاکل شي.
د دغو سياليو د پيل په مراسمو کې د المپيک، بدني روزنې او ورزش عمومي رياست فني او مسلکي مرستیال حافظ احمد جان ځدراڼ، د المپيکي چارو رئيس داد محمد پاينده اختري، د تکواندو ملي فدراسیون رئیس نجيب الله سکندري، ورزشي مسوولینو او ورزشکارانو ګډون کړی وو.
د ورزش ادارې فني او مسلکي مرستیال حافظ احمد جان ځدراڼ په خپلو خبرو کې د بېلابېلو ورزشي څانګو د ټاکنيزو سياليو په ترسراوي ټينګار وکړ او د ورزشي فدراسينونو سره د ورزش ادارې د ملاتړ او همکاريو يادونه وکړه او د تکواندو ملي فدراسیون يې يو له هغو فعالو فدراسیون څخه ياد کړ، چې د ورزش ادارې ملاتړ ورسره دی.
د يادو سياليو موخه د کابل ولايت د تکواندو لويانو ورزشکارانو منتخبې لوبډلې ته د غوره ورزشکارانو ټاکل او د ملي لوبډلې سياليو ګډون ته د ورزشکارانو زمينه برابرول دي.
