کابل کې د ۱۸۰ ورزشکارانو ترمنځ د کیک جیتسو سبک سیالۍ پای ته ورسېدې
د المپيک، بدني روزنې او ورزش عمومي ریاست په همکارۍ د رزمي لوبو ملي فدراسیون له لوري د کابل ښار د درېیمې ناحیه اړوند د کوټهسنګي په غوره اتلانو کمپ کې د شپږو ولایتونو له ۳۰ کلبونو د ۱۸۰ ورزشکارانو ترمنځ د رزمي لوبو کیک جیتسو سیالۍ پای ته ورسېدې، چې دوې ورځې یې دوام وکړ.
دغه سیالۍ د تنکیو ځوانانو، نویو ځوانانو، ځوانانو او د لویانو ورزشکارانو په عمري کټګوریو او په بېلا بېلو وزنونو کې د کابل، کاپيسا، پروان، لوګر، کنړ او پکتیا ولایتونو ورزشکارانو ترمنځ ترسره شوې، چې په پایله کې کابل لومړی، کاپيسا دویم، کنړ درېیم او لوګر ولایت بیا څلورم مقام خپل کړ.
یادې سیالۍ د کنړ ولایت د زلزله ځپلو سره د همدردۍ په موخه ترسره شوې.
